prathama-shatake tR^itiiya-stabakaH 


shubhra-smita-lesho mAturmarutAnnaH |
antastimirANAmantaM vidadhAtu ||   1

Adau bhuvanAnAM mAtApitarau tau |
devAsuramartyairvandyAvavinandyau ||   2

bruute pR^ithagekastau vigrahavantau |
Ahaika-shariiraM dvandvaM kaviranyaH ||   3

shaktiM tanushuunyAmiishaM cha pumAMsam.h |
vaktipramadAyAM nAsandehayuto.anyaH ||   4

iishaM cha tameke sanmAtramushanti |
brahmaikamathA.anye gAyanti, na shaktim.h ||   5

kechittanuhiinaM praj~nAyutamiishaM
shaktiM vidurasya praj~nAmavikuNThAm.h ||   6

uktaM dadhatastaiH kechitpunarAhuH |
mAyAtanubandhaM nAthasya na shakteH|   7

nityaM sashariirau yeShAM pitarau tau |
eko.apyatha vAtAn.h pratyAha visargaH ||   8

mAtApitarau, yat tAvekashariirau |
chitraprathanAthA, sA kAchana liilA ||   9

sanmAtrakathAnAM kArye manujAdau!
dhiisvAntavikAsaH syAt.h kAraNahiinaH ||   10

advaitibhiranyA mAyAshrayaNiyA |
shakteratiriktA sAkiM kimu vAdaiH ||   11

na syAt.h pR^ithagAtmA shakteH kimupAdheH |
chakShuH shritachittervishvAkR^ititAvA ||   12

ekAnta videhau tau chedati-suukShmau |
liilAtanubandhA shaktAvabhidheyau ||   13

bhaktAnugR^ihNan.h divyAdbhuta liilaH |
tadvigrahabandho bodhyolasadardhaH ||   14

striitvaM yadi neShTaM, puMstvaM kuta iShTam.h |
nAnA kimu nAriinasyAdanumeyA ||   15

tasmAt.h pitarau tau, vAchyau matimantau |
suukShmAvapi bhUyo, liilAtanumantau ||   16

nAsmattanupatte shaktiishvara-muurtii |
ekAmR^itaruupAtvanyA praNavAtmA ||   17

divyaM ghanatejaH kurvad.h dhvanimantaH |
sampashyadasheShaM muurtiH praNavAtmA ||   18

divyo ghanasomaH syaMdan.h rasamantaH |
bhu~njanbhuvanaughaM piiyuuSha shariiram.h ||   19

bodho.anavalambo divyaM khalu tejaH |
modaH parishuddho, divyaH khalu somaH ||   20

somAMshamahoMshau yAtoghanabhAvam.h |
pitrorbhuvanAnAM sa~Nkalpa mahimnA ||   21

AradhayasiishaM taM chinmayakAyam.h |
AnandamayA~Ngii tvam.h devi! kileyam.h ||   22

divyaM tava kAyaM divyaM tava vastre |
divyAnii tavAmba! svarNAbharaNAni ||   23

yaddevi vilokyAsya prAkR^itakAyA |
yuktiiH samatiitA seyaM tava mAyA ||   24

navyAstanumadhyAH pratnAMtanumadhyAm.h |
vidvatsada-siimAH samyak.h prathayantu ||   25


|| iti umAsahasre tR^itiiya-stabakaH ||